Classificacion deth Terren de Lauegi

Escala de Classificacion deth Terren de Lauegi

Era Escala de Classificacion deth Terren de Lauegi (Avalanche Terrain Exposure Scale, ATES) siguec desvolopada pes parcs de Canadà entà ajudar as montanhaires a evaluar era seriositat deth terren enes sues gessudes. Era escala permet evaluar era severitat d’ua rota o d’ua zòna damb tres classes de terren – simple, desafiant o complèxe – que descriuen era exposicion as possibles perilhs de lauegi.

Aguest sistèma de classificacion deth terren de lauegi se compause de dus modèls – eth Modèl de Comunicacion Publica e eth Modèl Tecnic. Eth Modèl Public presente es critèris basics de classificacion entàs tres classes de terren e ei dessenhat entà tot eth public en generau. Eth Modèl Tecnic ei basat en 11 variables discrètes que vien a díder çò de madeish qu’es critèris basics de classificacion deth terren mès utilize un lenguatge mès especific entà usatgèrs expèrts. Aguest Modèl Tecnic tanben ei utilizat pes professionaus entà classificar eth terren.

Guardatz a continuacion es dus modèls de classificacion deth terren de lauegi.

Modèl de Comunicacion Publica

Classe 1 - Simple
Exposicion a versants pòc arribents e terren forestièr. Quauques clarulhes de bòsc pòden implicar zònes d’arribada de lauegi pòc freqüents. Fòrça opcions entà redusir o eliminar era exposicion.

Classe 2 - Desafiant
Exposicion a zònes de trajècte de lauegi ben definides, a zònes de gessuda o a params. I a opcions entà redusir o eliminar era exposicion trobant rotes tient compde.

Classe 3 - Complèxe
Exposicion a zònes de trajècte de lauegi multiples e superposades o a granes extensions de terren dubèrt e arribent. Zònes d’inici de lauegi multiples e damb params ath dejós. Minimes opcions de redusir era exposicion.

Terren Simple

Tuc deth Miei (Fòto: CGA)

Cap des Clòsos (Fòto CGA)

Prüedo. Fòto CGA

Terren desafiant

Oelhacrestada. Fòto CGA

Passada deth Nebot. Fòto: CGA

Tuc de Sendrosa. Fòto: CGA

Terren Complèxe

Montardo e Circ de Saslòses. Fòto: CGA

Malh Blanc de Tredòs. Fòto: CGA

Tuc de Molières. Fòto: CGA

Classificacion deth terren en sector de Pontet. Auriò: rotes. Ròi: trajèctes de lauegi principaus. Fòto: C. Lluch.

Modèl Tecnic

Eth terren qualificat damb paramètres en cursiva e nereta, automaticaments requè en aquera classe de terren o en ua de mès nauta. *Critèri non considerat enes Pirenèus.

Er Evaluador

Er Evaluador ei un instrument complementari dera Escala de Classificacion deth Terren de Lauegi entà planificar es gessudes. Era finalitat der Evaluador ei condusir ar usatgèr ena eleccion objectiva e sistematica dera gessuda adequada ath terren (mejançant era ATES) e as condicions actuaus de nhèu e perilh de lauegi (mejançant eth Bulletin de Perilh de Lauegi). Damb aguest instrument, er usatgèr combine es dues informacions e obten coma resultat un conjunt de recomanacions adequades ath sòn nivèu d’entrenament e d’experiéncia en terren de nhèu e lauegi entà poder gestionar ben eth perilh de lauegi en ues condicions e un tipe de terren determinadi.

Evaluador. Adaptat entath Conselh Generau d’Aran dera publicacion “Avaluator Avalanche Accident Prevention Card – Second Edition”, ISBN# 978-0-9866597-2-0.

Recomanacions

NON SE RECOMANE circular pera montanha ena zòna de color ròi sense coneishements de nivèu professionau o expèrt en nhèu e lauegi. Condicions pròpries entà que i age accidents per lauegi.

Cau auer PRECAUCION ÈXTRA ena zòna de color auriò. Es lauegi son possibles per causes umanes o naturaus, e es accidents son freqüents. Se requerís un nivèu auançat de comprension deth perilh de lauegi existent.

Es condicions ena zòna verda son adequades entà circular per terren de lauegi e es accidents non son freqüents. Cau auer PRECAUCION, saber reconéisher eth perilh e auer es abilitats de circulacion damb seguretat e de rescat.

E bremba-te…

Bremba-te de portar er equip de seguretat essenciau: detector de victimes de lauegi (DVL), pala e sonda.

Saber reconéisher eth perilh, circular damb seguretat e efectuar eth rescat en cas d’accident per lauegi son abilitats basiques tostemp que circules per terren de lauegi. Pòs aquerir aguesti coneishements en tot hèr un cors de seguretat en terren de lauegi.

Referéncies

STATHAM, G., MCMAHON, B., TOMM, I., 2004. The Avalanche Terrain Exposure Scale, International Snow Science Workshop, Jackson Hole, Wyoming, USA. Descarga-te-lo en pdf.

HAEGELI, P., 2010. Avaluator: Avalanche Accident Prevention Card, 2nd edition. Canadian Avalanche Centre, Revelstoke, BC. 32 pp.

CAMPBELL, C., MARSHALL, P., 2010. Mapping Exposure to Avalanche Terrain, International Snow Science Workshop, Squaw Valley, California, USA. Descarga-te-lo en pdf.

BACARDIT, M., MONER, I., GAVALDÀ, J., 2011. Si la neu és el problema, la solució és en el terreny: Aplicació de l’Escala de Classificació del Terreny Allavós a la Val d’Aran, IV Jornades tècniques de neu i allaus. Homenatge a Xavier Bosch i Martí, Vielha, Val d’Aran. Descarga-te-lo en pdf.