Tant pes sues caracteristiques climatiques com orografiques, era Val d’Aran ei afectada extensament peth risc de lauegi. S’a calculat que, aproximadament, un 51% deth sòn territòri se trape expausat ad aguest fenomen. Quauques carretères, coma era deth pòrt dera Bonaigua, nombroses pistes forestaus (Varradòs, Artiga de Lin...) e quauqui pòbles e infraestructures pòden èster afectadi pes lauegi mès o mens excepcionaus. Ath delà, un nombre cada viatge major de visitants accedís a zònes de nauta montanha pendent es mesi d’iuèrn, ja sigue en esquís de montanha, raquetes o mòtos de nhèu, expausant-se a èster afectadi pes lauegi.

Entà mitigar aguest risc tàs persones e es béns, ena Val d’Aran s’an prenut diferentes mesures reductores deth risc:
D’un costat s’an anat realizant òbres de defensa antilauegi: es prumères sigueren es visières dera bòca nòrd deth tunèl de Vielha e dera carretèra de Beret e eth dic de Bossòst, mès tard s’i an anat higent es murs de Garòs e Arties, es hilats d’aguesti lauegi e de Beret, es bancades en aguest darrèr sector, entre d’auti.

Per un aute costat, des der an 1988 era val compde damb era preséncia continuada d’un tecnic de nhèu e lauegi, ath quau s’a somat, des dera tempsada 2003/2004, un dusau especialista pendent es mesi d’iuèrn, e des dera actuau tempsada 2010/2011 un tresau tecnic. Aguesti tecnics trebalhen laguens dera estructura deth Conselh Generau d’Aran, dat qu’es competéncies en Proteccion Civila sigueren transferides ad aguest organisme.

Es prètzhèts qu’aguesti tecnics porten a tèrme des deth Centre de Prediccion de Lauegi dera Val d’Aran deth Conselh Generau son:

• Prediccion de lauegi ena carretèra dera Bonaigua e ar accès tath Plan de Beret (mès informacion). Des der an 2003 s’edite un Comunicat de Perilh de Lauegi (CPA) destinat as responsables de carretères C-28 e C-142B, a Proteccion Civila, Mossos, etc. Aguest document ei utilizat entà valorar era viabilitat d’aguestes carretères e gestionar era sua dubertura o tancament.
• Seguiment dera activitat de lauegi ena val. Se fotografien e cartografien toti es lauegi des quaus s’a notícia, entà melhorar eth coneishement que s’a d’aguest fenomen.
• Manteniment deth hilat d’observadors nivometeorologics e d’estacions meteorologiques automatiques e punts de contròtle.
• Obtencion de donades nivologiques entara elaboracion deth Bulletin de Perilh de Lauegi a escala regionau que realize er Institut Geologic de Catalonha.
• Elaboracion e emission deth Bulletin de Perilh de Lauegi especific tara Val d’Aran es deluns, dimèrcles e diuèndres.
• Prediccion d’itineraris de montanha d'Aran. Des dera tempsada 2007-2008se realise ua prediccion de lauegi a escala locau centrada enes accesi tàs refugis sauvadi dera Val e tara bèra ua des ascensions classiques propères ad aguesti refugis.
• Corsi de formacion e divulgacion. S’organizen corsi de formacion destinadi a montanhencs (esquiadors, surfers de nhèu, escaladors...), conferéncies, etc.
• Rescats en accidents produsits per lauegi a on participen es Pompièrs d’Aran, a on un tecnic deth Conselh realize era valoracion deth risc e recuelh donades entà, posteriorament, analisar quines son es causes e circomstàncies d’aguesti accidents.